గొర్రెల కాపరి నుంచి ఐపీఎస్‌ వరకు: బిర్దేవ్ డోన్ స్ఫూర్తి యాత్ర

మహారాష్ట్రలోని కాగల్ తాలూకాలోని యామ్గే గ్రామానికి చెందిన ఒక గొర్రెల కాపరి కుమారుడు బిర్దేవ్ సిద్ధప్ప డోన్, తన అసాధారణ పట్టుదల కృషితో యూపీఎస్సీ సివిల్ సర్వీసెస్ పరీక్షలో 551వ ర్యాంకు సాధించి, భారత పోలీసు సర్వీస్ (ఐపీఎస్)లో స్థానం సంపాదించాడు. ఈ స్ఫూర్తియాత్ర గ్రామీణ భారతదేశంలోని వేలాది మంది గ్రామీణ యువతకు ఆదర్శంగా నిలుస్తోంది.

చిన్నతనంలో పేదరికంతో పోరాడిన బిర్దేవ్, పూణేలోని కాలేజ్ ఆఫ్ ఇంజనీరింగ్ (సీఓఈపీ) నుంచి సివిల్ ఇంజనీరింగ్‌లో డిగ్రీ పూర్తి చేశాడు. తన నిరాడంబరమైన నేపథ్యం కారణంగా సహవిద్యార్థుల నుంచి ఎన్నో అవమానాలను ఎదుర్కొన్నప్పటికీ, అతను తన లక్ష్యం నుంచి ఏమాత్రం వెనక్కు తగ్గలేదు. ఈ క్రమంలో, జలోచి గ్రామానికి చెందిన డాక్టర్ రాజేంద్ర చోప్డే మేనల్లుడైన ప్రాంజల్ చోప్డే అతనికి స్నేహితుడు వెన్నుదన్నుగా నిలిచాడు. ధన్గర్ (కురుమ)సామాజిక వర్గానికి చెందిన బిర్దేవ్‌కు ప్రాంజల్ సహకారం అమూల్యంగా మారింది.

రెండేళ్ల క్రితం యూపీఎస్సీ ఫారెస్ట్ సర్వీసెస్ పరీక్షలో ఉత్తీర్ణుడైన ప్రాంజల్, బిర్దేవ్‌కు సివిల్ సర్వీసెస్ పరీక్షల వైపు అడుగులు వేయడానికి ప్రేరణగా నిలిచాడు. స్థిరమైన ఉద్యోగ అవకాశాలను తిరస్కరించిన బిర్దేవ్, కఠినమైన సివిల్స్ సన్నాహక ప్రిపరేషన్ లో మునిగిపోయాడు. సీఓఈపీలోని మరో సహవిద్యార్థి అక్షయ్ సోలంకర్ కూడా అతనికి బాసటగా నిలిచాడు.

ఫలితాలు వెలువడే కొద్ది రోజుల ముందు, పూణేలో బిర్దేవ్ ఫోన్ చోరీకి గురైంది. ఫిర్యాదు చేయడానికి వెళ్లినప్పుడు, పోలీసులు మొదట ఎఫ్‌ఐఆర్ నమోదు చేయడానికి నిరాకరించారు. సర్వీస్ శిక్షణలో ఉన్న స్నేహితుల జోక్యంతోనే ఫిర్యాదు నమోదైంది, అయితే ఎలాంటి చర్యలు తీసుకోలేదు. విధి వైపరీత్యంగా, ఒకప్పుడు అతని ఫిర్యాదును పట్టించుకోని పోలీసు శాఖలో ఇప్పుడు అతను ఒక అధికారిగా చేరనున్నాడు.

ఫలితాలు వెలువడినప్పుడు, ప్రాంజల్ బిర్దేవ్ పేరును జాబితాలో చూసి, సంతోషంతో అతనికి ఫోన్ చేశాడు. అప్పటికి బిర్దేవ్, ఎండలో పశువులను మేపుతూ ఉన్నాడు. రెండు నెలల క్రితం అతని తండ్రికి కిడ్నీ స్టోన్ ఆపరేషన్ జరిగింది, కానీ ఆ తర్వాత సమస్యలు తలెత్తడంతో కుటుంబం ఆర్థిక ఇబ్బందుల్లో కూరుకుపోయింది. ఈ సమయంలో, బిర్దేవ్ తన స్నేహితుడు ఐఏఎస్ అధికారి ఆశిష్ పాటిల్ సహాయం కోరాడు. ఆశిష్, ఒక ప్రైవేట్ వైద్య కళాశాల ఆసుపత్రిలో చికిత్సకు ఏర్పాటు చేశాడు. అయినప్పటికీ, కుటుంబ బాధ్యతలు బిర్దేవ్ భుజాలపైనే ఉన్నాయి.

బెల్గామ్ నగరంలోని భవానీ నగర్‌లో ఒకప్పుడు తన కుటుంబ గొర్రెలను మేపిన బిర్దేవ్, ఇప్పుడు ఐపీఎస్ అధికారిగా గౌరవప్రదమైన భవిష్యత్తు వైపు అడుగులు వేస్తున్నాడు. బీర్దేవ్ కథ, కేవలం వ్యక్తిగత విజయం మాత్రమే కాదు, పట్టుదల, ధైర్యం, స్వప్నాలను సాకారం చేసుకోవడానికి అవసరమైన అచంచలమైన నిబద్ధతకు నిదర్శనం.

గర్వపడుతున్న బీరప్ప సిద్ధప్ప కుటుంబం, గ్రామ ప్రజలు

సిద్ధప్ప డోన్, తండ్రి:
“నా కొడుకు ఏ పరీక్ష రాశాడో, ఏ ఘనత సాధించాడో నాకు పూర్తిగా తెలీదు. వాడి కల ఆర్మీలో చేరడం, అది నెరవేరకపోవడంతో బాధపడేవాడు. ఇప్పుడు పెద్ద పోలీస్ ఆఫీసర్ అవుతాడని అంతా చెబుతుంటే గుండె ఉప్పొంగిపోతోంది. వాడు సంతోషంగా ఉన్నాడు, అది చాలు!”

యెల్లప్ప గద్ది, మేనమామ:
“మా బీరప్ప దేశంలోనే అతి పెద్ద పరీక్ష రాసి, సర్కారీ కొలువు సంపాదించాడు! ఇది మా గ్రామానికి, మా జాతికి గర్వకారణం. ఊరంతా స్వీట్లు పంచి సంబరాలు చేసుకున్నాం. వాడు మంచి ఆఫీసర్‌గా మా లాంటి పేదవాళ్లకు సాయం చేస్తే చాలు. బీరప్ప స్ఫూర్తితో మా జాతి యువత చదువుకుని ముందుకొస్తే, అది మాకు అతిపెద్ద విజయం!”