ఉచ్చు లో చిక్కుకుని గర్భంతో ఉన్న చిరుత పులి మృతి

అన్నమయ్య జిల్లాలో ఘోరం: గర్భంతో ఉన్న చిరుత మృతి, అటవీ అధికారుల నిర్లక్ష్యంపై స్థానికుల ఆగ్రహం

అన్నమయ్య జిల్లాలోని మదనపల్లి మండలం పొన్నేటిపాలెం అడవి సమీపంలో బుధవారం తెల్లవారుజామున దారుణ ఘటన చోటుచేసుకుంది. వేటగాళ్లు ఏర్పాటు చేసిన ఉచ్చులో గర్భంతో ఉన్న చిరుత చిక్కుకుని, దాదాపు 10 గంటలపాటు ఆకలి, దాహం, డీహైడ్రేషన్‌తో నరకయాతన అనుభవించి చనిపోయింది. చిరుత గర్భంలో ఉన్న రెండు పిల్లలు కూడా కడుపులోనే మృతిచెందినట్లు తేలింది. ఈ ఘటనపై అటవీ అధికారుల నిర్లక్ష్యంపై స్థానికులు తీవ్ర ఆగ్రహం వ్యక్తం చేస్తున్నారు.

అసలు ఏం జరిగింది?
స్థానికుల సమాచారంతో అటవీ అధికారులు ఘటనాస్థలానికి చేరుకున్నారు. చిరుతను ఉచ్చు నుంచి విడిపించేందుకు మత్తు మందు ఇంజెక్షన్ ఇవ్వాలని, దాన్ని బోనులో బంధించాలని ప్రణాళిక వేశారు. అయితే, మత్తు మందు ఇంజెక్షన్ ఇచ్చే షూటర్ అందుబాటులో లేకపోవడంతో గంటల తరబడి వేచి చూడాల్సి వచ్చింది. ఈ క్రమంలో ఎండ తీవ్రత పెరగడం, షూటర్ రాకపోవడంతో చిరుత ఉచ్చులోనే కొట్టుమిట్టాడింది. చివరకు డీహైడ్రేషన్‌తో ప్రాణాలు విడిచింది.

అటవీ అధికారుల వివరణ
పొన్నేటిపాలెం రిజర్వ్ ఫారెస్ట్ సబ్ డీఎఫ్‌వో శ్రీనివాసులు స్పందిస్తూ, తమ వైపు నిర్లక్ష్యం ఏమీ లేదని వివరణ ఇచ్చారు. చిరుతను చూసేందుకు స్థానికులు భారీగా గుమిగూడడంతో వారిని చెదరగొట్టడానికే ఎక్కువ సమయం పట్టిందని తెలిపారు. చనిపోయిన చిరుతకు పోస్ట్‌మార్టం నిర్వహించి పూర్తి వివరాలు వెల్లడిస్తామన్నారు. అడవి సమీపంలోని పొలాల్లోకి అడవి పందులు వస్తుండటంతో, రైతులు పంటల రక్షణ కోసం ఉచ్చులు ఏర్పాటు చేసి ఉండవచ్చని, లేదా వేటగాళ్లు పెట్టి ఉండవచ్చని అనుమానిస్తున్నట్లు పేర్కొన్నారు. దీనిపై విచారణ జరుగుతుందని చెప్పారు.

స్థానికుల ఆవేదన
చిరుత మృతి తర్వాత దాని గర్భంలో రెండు పిల్లలు ఉన్నట్లు అధికారులు గుర్తించారు. దీంతో అటవీ అధికారుల నిర్లక్ష్యం వల్లే ఈ దుర్ఘటన జరిగిందని స్థానికులు, రైతులు తీవ్రంగా ఆరోపించారు. అధునాతన సాంకేతికత ఉన్నా గర్భవతి చిరుతను కాపాడలేకపోయారని, ఉదయం నుంచి నిర్లక్ష్యంగా వ్యవహరించారని మండిపడ్డారు. ఈ ఘటన స్థానికుల్లో తీవ్ర ఆవేదనను మిగిల్చింది.

విచారణకు ఆదేశం
ఈ ఘటనపై అటవీ శాఖ ఉన్నతాధికారులు విచారణకు ఆదేశించారు. ఉచ్చు ఎవరు ఏర్పాటు చేశారు, అధికారుల నిర్లక్ష్యం ఎంతవరకు ఉంది అనే అంశాలపై లోతైన దర్యాప్తు జరుగుతుందని తెలిపారు.