స్వచ్ఛత స్పెషల్ క్యాంపెయిన్ 5.0లో సింగరేణి సంస్థకు జాతీయ అవార్డు
కేంద్ర మంత్రి జి. కిషన్ రెడ్డి చేతులమీదుగా అవార్డు స్వీకరించిన సీఎండీ ఎన్. బలరామ్
హైదరాబాద్, నవంబర్ 13:
దేశవ్యాప్తంగా నిర్వహించిన స్వచ్ఛత స్పెషల్ క్యాంపెయిన్ 5.0 కార్యక్రమంలో సింగరేణి కొల్లియరీస్ కంపెనీ లిమిటెడ్ (SCCL) జాతీయస్థాయి ఉత్తమ సంస్థగా ఎంపికై మరొకసారి ప్రఖ్యాతి గడించింది. కేంద్ర బొగ్గు, గనుల శాఖ ఆధ్వర్యంలో నిర్వహించిన ఈ కార్యక్రమంలో సింగరేణి సంస్థ ప్రతిభావంతంగా నిలిచి దేశంలోని అన్ని కోల్ ఇండియా కంపెనీలను, ఇతర గనుల సంస్థలను మించి అగ్రస్థానాన్ని దక్కించుకుంది.
గురువారం సాయంత్రం న్యూ ఢిల్లీలో జరిగిన బహుమతి ప్రదానోత్సవంలో కేంద్ర బొగ్గు, గనుల శాఖ మంత్రి శ్రీ జి. కిషన్ రెడ్డి చేతులమీదుగా సింగరేణి సీఎండీ శ్రీ ఎన్. బలరామ్ అవార్డును స్వీకరించారు. ఈ సందర్భంగా బొగ్గు శాఖ కార్యదర్శి విక్రమ్ దేవ్ దత్ సహా ఉన్నతాధికారులు పాల్గొన్నారు.
సీఎండీ బలరామ్ మాట్లాడుతూ, “సింగరేణి సంస్థ బొగ్గు, విద్యుత్, గ్రీన్ ఎనర్జీ ఉత్పత్తిలో మాత్రమే కాకుండా పరిశుభ్రత, పచ్చదనంలో కూడా దేశానికి ఆదర్శంగా నిలుస్తోంది. ఈ విజయంలో పాత్ర వహించిన ప్రతి ఉద్యోగి, అధికారి గర్వకారణం,” అని పేర్కొన్నారు.
గత నెల గాంధీ జయంతి సందర్భంగా ప్రారంభమైన ఈ క్యాంపెయిన్ 30 రోజులపాటు కొనసాగింది. ఈ కాలంలో సింగరేణి సంస్థ 355 ప్రదేశాలలో 7.65 లక్షల చదరపు అడుగుల విస్తీర్ణంలో శుభ్రత కార్యక్రమాలు చేపట్టింది. అలాగే వివిధ విభాగాలలో సంవత్సరాలుగా నిరుపయోగంగా ఉన్న 1.70 లక్షల ఫైళ్లను తనిఖీ చేసి, 56,200 ఫైళ్లను తొలగించింది.
దేశవ్యాప్తంగా కోల్ ఇండియా మరియు ఇతర సంస్థలు కలిపి 14 కంపెనీలు పాల్గొన్న ఈ పోటీలో సింగరేణి తన సుస్థిరమైన పనితీరు, క్రమశిక్షణతో ముందంజ వేసింది. స్వచ్ఛతతో పాటు పచ్చదనాన్ని ప్రోత్సహించడంలో సింగరేణి సంస్థ చూపిన కట్టుబాటు ఇతర ప్రభుత్వ సంస్థలకు స్ఫూర్తిగా నిలుస్తోందని అధికారులు అభిప్రాయపడ్డారు.
