తెలంగాణ గ్రామ పంచాయతీ ఎన్నికలు : తొలి విడత నామినేషన్ల ప్రక్రియ నేటి నుంచి ప్రారంభం
హైదరాబాద్, నవంబర్ 27: తెలంగాణలో గ్రామ పంచాయతీ ఎన్నికల తొలి విడత నామినేషన్ల స్వీకరణ ప్రక్రియ నేటి (బుధవారం) నుంచి ప్రారంభమవుతుంది. మూడు రోజుల పాటు ఈ ప్రక్రియ కొనసాగనుండగా, ఈ నెల 30వ తేదీన నామినేషన్ల పరిశీలన (స్క్రూటినీ) జరుగనుంది. అభ్యర్థులు డిసెంబర్ 3వ తేదీ వరకు తమ నామినేషన్లను ఉపసంహరించుకోవచ్చని రాష్ట్ర ఎన్నికల సంఘం తెలిపింది.
తొలి విడతలో మొత్తం 4,236 సర్పంచ్ పదవులు, 37,440 వార్డు మెంబరు స్థానాలకు ఎన్నిక జరగనుంది. ఈ ఎన్నికలకు సంబంధించి డిసెంబర్ 11వ తేదీన ఉదయం 7 గంటల నుంచి మధ్యాహ్నం 1 గంట వరకు పోలింగ్ నిర్వహించనున్నారు.
రాష్ట్రవ్యాప్తంగా మూడు విడతలుగా ఈ ఎన్నికలు జరగనుండగా, తొలి విడత ప్రక్రియతోనే అధికార, ప్రతిపక్ష పార్టీల అభ్యర్థులు బరిలో దిగేందుకు సిద్ధమవుతున్నారు. ఎన్నికల నియమావళి కఠినంగా అమలు చేస్తామని రాష్ట్ర ఎన్నికల కమిషనర్ ఇటీవలే స్పష్టం చేశారు.
ఈ మేరకు అన్ని జిల్లాల్లోనూ రిటర్నింగ్ అధికారులు, సిబ్బంది అప్రమత్తంగా ఉండాలని ఆదేశాలు జారీ అయ్యాయి.
