వియత్నాంలో విషాదం..

భారతీయ పర్యాటకులతో ప్రయాణిస్తున్న బోటు బోల్తా

వియత్నాంలో విషాదం.. భారతీయ పర్యాటకులతో ప్రయాణిస్తున్న బోటు బోల్తా

15 మందికిపైగా మృతి.. ఏపీ, తెలంగాణకు చెందిన పలువురు బాధితులు.. సహాయక చర్యలు కొనసాగుతున్నాయి

హనోయి/న్యూఢిల్లీ, జూలై 11 (VGlobe News):
వియత్నాంలో భారతీయ పర్యాటకులను విషాదం కమ్మేసింది. దక్షిణ వియత్నాంలోని ప్రముఖ పర్యాటక కేంద్రం ఫూ క్వాక్ (Phu Quoc) ద్వీపం సమీపంలో భారతీయ పర్యాటకులతో ప్రయాణిస్తున్న స్పీడ్‌బోటు శనివారం బోల్తా పడటంతో కనీసం 15 మంది మృతి చెందినట్లు స్థానిక అధికారులు వెల్లడించారు. మరో 21 మందిని సురక్షితంగా రక్షించగా, గల్లంతైన వారి కోసం గాలింపు చర్యలు కొనసాగుతున్నాయి. ప్రమాదానికి గురైన బోటులో 32 మంది భారతీయ పర్యాటకులు, నలుగురు సిబ్బంది ఉన్నట్లు ప్రాథమిక సమాచారం వెల్లడైంది. ప్రమాదానికి గల కారణాలపై అధికారులు దర్యాప్తు చేపట్టారు.

భారత విదేశాంగ శాఖ తెలిపిన వివరాల ప్రకారం, భారతీయులు విహారయాత్ర ముగించుకుని తిరిగి వస్తుండగా, హాన్ మే రుట్ (Hon May Rut) ద్వీపం సమీపంలో సముద్ర అలలు ఉధృతంగా ఉండటంతో బోటు బోల్తా పడింది. బోటులోని పలువురు ప్రయాణికులు లోపలే చిక్కుకుపోవడంతో సహాయక చర్యలు క్లిష్టంగా మారాయి. స్థానిక మత్స్యకారులు, కోస్ట్‌గార్డ్, నౌకాదళం, సరిహద్దు భద్రతా బలగాలు సంయుక్తంగా సహాయక చర్యలు చేపట్టాయి.

ప్రాథమిక సమాచారం ప్రకారం మృతుల్లో ఆంధ్రప్రదేశ్‌లోని కడపకు చెందిన శ్రీధర్, మచిలీపట్నానికి చెందిన జయశ్రీ ఉన్నట్లు తెలుస్తోంది. మరో నలుగురు ఆంధ్రప్రదేశ్‌కు చెందిన వారు గల్లంతైనట్లు సమాచారం. బాధితుల్లో తెలంగాణకు చెందిన పర్యాటకులు కూడా ఉన్నట్లు తెలుస్తుండగా, వారి వివరాలను అధికారులు ధృవీకరిస్తున్నారు. పర్యటనకు వెళ్లిన వారిలో ఎక్కువ మంది ఓ ప్రైవేట్ మొబైల్ ఫోన్ కంపెనీ డిస్ట్రిబ్యూటర్లు ఉన్నట్లు సమాచారం. ఆ సంస్థ వార్షిక సమావేశం సందర్భంగా సుమారు 250 మందిని వియత్నాం పర్యటనకు తీసుకెళ్లగా, వారిలో ఆంధ్రప్రదేశ్‌కు చెందిన 35 మంది, తెలంగాణకు చెందిన 40 మంది ఉన్నట్లు తెలుస్తోంది.

ఈ ఘటనపై వియత్నాంలోని భారత రాయబార కార్యాలయం తీవ్ర దిగ్భ్రాంతి వ్యక్తం చేసింది. “కొన్ని గంటల క్రితం ఫూ క్వాక్ ద్వీపం సమీపంలో భారతీయ పర్యాటకులతో ప్రయాణిస్తున్న బోటు బోల్తా పడింది. స్థానిక అధికారులు సహాయక చర్యలు కొనసాగిస్తున్నారు. ఘటనకు సంబంధించిన పూర్తి వివరాలను సేకరిస్తున్నాం” అని ఎక్స్‌ (ట్విట్టర్‌) వేదికగా వెల్లడించింది. బాధిత కుటుంబాలకు సమాచారం అందించేందుకు హో చి మిన్ సిటీ భారత కాన్సులేట్, అలాగే హనోయిలోని భారత రాయబార కార్యాలయం వద్ద ప్రత్యేక కంట్రోల్ రూమ్‌లు ఏర్పాటు చేసినట్లు తెలిపింది.

ప్రధానమంత్రి నరేంద్ర మోదీ ఘటనపై సంతాపం వ్యక్తం చేస్తూ, బాధితులకు అవసరమైన సహాయం అందించాలని భారత రాయబార కార్యాలయ అధికారులను ఆదేశించినట్లు సమాచారం. స్థానిక అధికారులతో భారత అధికారులు నిరంతరం సమన్వయం చేసుకుంటూ పరిస్థితిని పర్యవేక్షిస్తున్నారు.

బాధితుల సమాచారం కోసం హెల్ప్‌లైన్ నంబర్లు

• హో చి మిన్ సిటీ కంట్రోల్ రూమ్: +84 36 281 7930, +84 91 552 3714, +84 33 452 0414
• హనోయి కంట్రోల్ రూమ్: +84 91 308 9165