రుద్రారంలో తోషిబా కొత్త ఫ్యాక్టరీ: రూ.562 కోట్ల పెట్టుబడి ఒప్పందం

రుద్రారంలో తోషిబా కొత్త ఫ్యాక్టరీ: రూ.562 కోట్ల పెట్టుబడి ఒప్పందంహైదరాబాద్, ఏప్రిల్ 18, 2025: తోషిబా కార్పొరేషన్‌లోని అనుబంధ సంస్థ ట్రాన్స్‌మిషన్ డిస్ట్రిబ్యూషన్ సిస్టమ్స్ ఇండియా (టీటీడీఐ) తెలంగాణ ప్రభుత్వంతో కలిసి విద్యుత్ సరఫరా మరియు పంపిణీ రంగంలో పెట్టుబడులు, ఆవిష్కరణలను ప్రోత్సహించేందుకు ఒక ముఖ్యమైన ఒప్పందం (ఎంవోయూ) కుదుర్చుకుంది. ఈ ఒప్పందం కింద హైదరాబాద్ సమీపంలోని రుద్రారంలో టీటీడీఐ కొత్త ఫ్యాక్టరీని ఏర్పాటు చేయనున్నది, దీనికి రూ.562 కోట్ల పెట్టుబడినున్నారు. ఈ ప్రాజెక్ట్ అత్యాధునిక టెక్నాలజీని వినియోగించి విద్యుత్ రంగంలో పెరుగుతున్న డిమాండ్‌ను తీర్చడంతో పాటు ఉద్యోగ అవకాశాలను కూడా సృష్టిస్తుంది.

టీటీడీఐ ఇప్పటికే రుద్రారంలో రెండు ఫ్యాక్టరీలను విజయవంతంగా నిర్వహిస్తోంది. ఈ కొత్త పెట్టుబడితో మూడో ఫ్యాక్టరీని నెలకొల్పేందుకు సిద్ధమైంది. ఈ ఫ్యాక్టరీలో సర్జ్ అరెస్టర్స్ తయారీకి ప్రత్యేక ఆవరణను ఏర్పాటు చేస్తారు. అదేవిధంగా, పవర్ ట్రాన్స్ఫార్మర్స్, డిస్ట్రిబ్యూషన్ ట్రాన్స్ఫార్మర్స్, గ్యాస్ ఇన్సులేటెడ్ స్విచ్‌గేర్ (జీఐఎస్) ఉత్పత్తి సామర్థ్యాన్ని పెంచేందుకు ఇప్పటి ఫ్యాక్టరీలను అప్‌గ్రేడ్ చేయనున్నారు. ఈ ప్రయత్నం ద్వారా రాష్ట్రం యొక్క విద్యుత్ మౌలిక సదుపాయాలు మరింత బలోపేతమవుతాయని ఆశాభావం వ్యక్తమవుతోంది.

టోక్యోలో జరిగిన ఉన్నత స్థాయి సమావేశంలో ఈ ఒప్పందంపై సంతకాలు చోటు చేసుకున్నాయి. ఈ కార్యక్రమంలో ముఖ్యమంత్రి ఎ. రేవంత్ రెడ్డి సమక్షంలో తోషిబా కార్పొరేషన్ ఎనర్జీ బిజినెస్ డైరెక్టర్ హిరోషి కనెటా, రాష్ట్ర ప్రభుత్వ స్పెషల్ చీఫ్ సెక్రెటరీ జయేష్ రంజన్, టీటీడీఐ చైర్మన్ మరియు మేనేజింగ్ డైరెక్టర్ హిరోషి ఫురుటా పాల్గొన్నారు. ఈ సందర్భంగా ముఖ్యమంత్రి రేవంత్ రెడ్డి మాట్లాడుతూ, ఆర్థిక పరివర్తనలో తెలంగాణ దేశంలో ముందు వరుసలో నిలుస్తోందని పేర్కొన్నారు. పరిశ్రమల భాగస్వామ్యాలు, వ్యూహాత్మక సహకారాల ద్వారా ప్రపంచ పెట్టుబడిదారులను ఆకర్షిస్తున్నామని చెప్పారు. తోషిబా చేసిన ఈ కొత్త పెట్టుబడి ఒప్పందం పారిశ్రామిక రంగంలో కొత్త ఉత్సాహాన్ని నింపుతుందని అభిప్రాయపడ్డారు.

టీటీడీఐ చైర్మన్ హిరోషి ఫురుటా మాట్లాడుతూ, తెలంగాణ ప్రభుత్వం అనుసరిస్తున్న పారిశ్రామిక విధానాలు తమను ఆకట్టుకున్నాయని పేర్కొన్నారు. ప్రభుత్వం ఆవిష్కరణలపై చూపుతున్న నిబద్ధత తెలంగాణను పెట్టుబడుల కేంద్రంగా మార్చే అవకాశం కలిగి ఉందని అన్నారు. తెలంగాణ ప్రభుత్వంతో కలిసి పని చేసేందుకు ఉత్సాహంగా ఉన్నట్లు వ్యక్తం చేశారు. ఈ ఒప్పందం రాష్ట్ర ఆర్థిక అభివృద్ధిలో మరో మైలురాయిగా నిలుస్తుందని ఆయన ఆశాభావం వ్యక్తం చేశారు.