22 రాష్ట్రాల నుంచి 100కుపైగా నర్సరీలు..
ఒకే వేదికపై పూలు, పండ్లు, అలంకరణ మొక్కలు, విత్తనాలు, వ్యవసాయ ఉత్పత్తులు
మొక్కల కొనుగోలుకు తరలివచ్చిన హైదరాబాద్ గ్రీనరీ ప్రియులు
హైదరాబాద్: నగరంలో పచ్చదనం, పర్యావరణ పరిరక్షణకు ఊతమిచ్చే 20వ గ్రాండ్ నర్సరీ మేళా ఘనంగా ప్రారంభమైంది. ప్రసాద్ ఐమాక్స్ సమీపంలోని హెచ్ఎండీఏ గ్రౌండ్స్లో నిర్వహిస్తున్న ఈ మేళాను రాష్ట్ర వ్యవసాయ శాఖ మంత్రి తుమ్మల నాగేశ్వరరావు ముఖ్య అతిథిగా హాజరై లాంఛనంగా ప్రారంభించారు.
దేశవ్యాప్తంగా 22 రాష్ట్రాల నుంచి 100కుపైగా నర్సరీలు, వ్యవసాయ ఉత్పత్తుల ప్రదర్శన సంస్థలు మేళాలో పాల్గొంటున్నాయి. వివిధ రకాల పూల మొక్కలు, పండ్ల మొక్కలు, అలంకరణ మొక్కలు, ఔషధ మొక్కలు, ఇంటి తోటలకు అనువైన మొక్కలతో పాటు విత్తనాలు, వ్యవసాయ ఉత్పత్తులను ప్రదర్శనకు ఉంచారు.
మొక్కల కొనుగోలుకు భారీ స్పందన
మేళా ప్రారంభమైన తొలిరోజు నుంచే హైదరాబాద్ నగరానికి చెందిన గ్రీనరీ ప్రియులు, ఇంటి తోటల పెంపకందారులు, రైతులు పెద్ద సంఖ్యలో తరలివచ్చారు. వివిధ ప్రాంతాల నుంచి వచ్చిన నర్సరీల్లో అందుబాటులో ఉన్న మొక్కలను పరిశీలించి, తమ అవసరాలకు అనుగుణంగా ఎంపిక చేసుకుని కొనుగోలు చేశారు.
ఇంటి ఆవరణలు, బాల్కనీలు, టెర్రస్ గార్డెన్లలో పెంచుకునేందుకు అనువైన మొక్కలతో పాటు పూలు, పండ్ల మొక్కలు, అలంకరణ మొక్కలకు సందర్శకుల నుంచి విశేష ఆదరణ లభించింది.
ఒకే వేదికపై విభిన్న రకాల మొక్కలు
దేశంలోని వివిధ ప్రాంతాల నుంచి వచ్చిన నర్సరీల కారణంగా అరుదైన, ప్రత్యేకమైన మొక్కలను కూడా ఒకే వేదికపై చూసే అవకాశం సందర్శకులకు లభిస్తోంది. మొక్కల పెంపకం, తోటల నిర్వహణపై నిపుణుల సూచనలు పొందడంతో పాటు తమకు అవసరమైన విత్తనాలు, వ్యవసాయ ఉత్పత్తులను కొనుగోలు చేసుకునే అవకాశం కల్పించారు.
నగర జీవనంలో పచ్చదనాన్ని పెంపొందించడంతో పాటు ఇంటి తోటలు, టెర్రస్ గార్డెనింగ్, పట్టణ ఉద్యానవనాలపై ప్రజల్లో ఆసక్తిని పెంచేలా నర్సరీ మేళా కొనసాగుతోంది. దీంతో హెచ్ఎండీఏ గ్రౌండ్స్ పరిసరాలు పచ్చదనం, పూల అందాలతో సందడిగా మారాయి.
