ఫ్యూచర్​ సిటీ.. భవిష్యత్ నగరమే..

వేగంగా ఫ్యూచర్ సిటీ పనులు..
@అమెరికా తరహాలో వరల్డ్ ట్రేడ్ సెంటర్
ఫ్యూచర్ సిటీ నిర్మాణాన్ని ప్రతిష్ఠాత్మకంగా తీసుకున్న సీఎం రేవంత్
@లైఫ్ సైన్సెస్ హబ్ , ఎలక్ట్రానిక్స్  అధిక కేటాయింపులు
@10,124 ఎకరాల్లో 8 జోన్లుగా నిర్మాణం
రెసిడెన్షియల్ జోన్లకు 1,170 ఎకరాలు
@50 ఎకరాల్లో వరల్డ్ ట్రేడ్ సెంటర్ నిర్మాణం

హైదారాబాద్, సెప్టెంబర్ 10

తెలంగాణ ప్రభుత్వం ప్రతిష్ఠాత్మకంగా తీసుకున్న ఫ్యూచర్ సిటీ, నెట్ జీరో సిటీ పనులు శరవేగంగా జరుగుతున్నాయి. హైదరాబాద్కు దక్షిణంగా మొత్తం 10,124 ఎకరాల్లో ఈ సిటీ నిర్మాణం కానుంది. సిటీ శివారులోని ముచ్చెర్ల, మీర్ ఖాన్ పేట్ తదితర 10 గ్రామాలు ఫ్యూచర్ సిటీలో ఉంటాయి. హైదరాబాద్ ఫార్మా సిటీ (హెచ్పీసీ) కూడా ఇక్కడే నిర్మించనున్నారు.

8 జోన్లు ఫ్యూచర్ సిటీ నిర్మాణం
ఫ్యూచర్ సిటీని మొత్తం 8 జోన్లుగా విభజించనున్నారు.ఇందులో ఆర్టిఫిషియల్ ఇంటెలిజెన్స్ సిటీ, లైఫ్ సైన్సెస్ హబ్, హెల్త్ సిటీ, స్పోర్ట్స్ హబ్, ఎలక్ట్రానిక్స్ అండ్ అడ్వాన్స్డ్ మాన్యుఫ్యాక్చరింగ్ జోన్, ఎడ్యుకేషన్ అండ్ యూనివర్సిటీ జోన్, రెసిడెన్షియల్ జోన్, మిక్స్డ్ అండ్ ఎంటర్టైన్మెంట్ జోన్ ఉంటాయి.

లైఫ్ సైన్సెస్, ఎలక్ట్రానిక్ రంగాలకే అత్యధిక కేటాయింపులు
ఈ సిటీలోని మొత్తం పదివేల ఎకరాల్లో అత్యధికంగా లైఫ్ సైన్సెస్ హబ్, ఎలక్ట్రానిక్స్ మాన్యుఫ్యాక్చరింగ్ జోన్లకు ఏకంగా 8 వేల ఎకరాలు కేటాయించారు. ఇందులో లైఫ్ సైన్సెస్ హబ్కు 4,207 ఎకరాలు, ఎలక్ట్రానిక్స్ మ్యానిఫాక్షరింగ్ జోన్ కు 3,642 ఎకరాలు కేటాయిస్తారు. హైదరాబాద్ లోని వివిధ ప్రాంతాల నుంచి శంషాబాద్ విమానాశ్రయం, రీజినల్ రింగ్ రోడ్డు నుంచి ప్యూచర్సిటీకి చేరుకునేందుకు రోడ్డు, మెట్రో రైలు కనెక్టివిటీని కల్పించడంతో పాటు ఇన్ఫ్రాస్ట్రక్షర్ కు ఏర్పాటు చేయనున్నారు.

రెసిడెన్షియల్ జోన్లకు 1,170 ఎకరాలు
ఏఐ (ఆర్టిఫిషియల్ ఇంటెలిజెన్స్) సిటీకి 140 ఎకరాలు కేటాయించనున్నారు. అందులో ఇన్నోవేషన్ అండ్ ఇంక్యుబేషన్ హబ్, సెంటర్ ఆఫ్ ఎక్సలెన్స్, అప్లికేషన్ అండ్ కొలాబరేషన్ సెంటర్, ఎక్స్ పీరియన్స్ సెంటర్ నిర్మిస్తారు. కందుకూరు మండలంలోని మీర్ఖాన్పేట్ లో స్కిల్ యూనివర్సిటీ నిర్మాణానికి సీఎం రేవంత్రెడ్డి ఇటీవలే శంకుస్థాపన చేశారు. ఇక్కడ ఎడ్యుకేషన్ అండ్ యూనివర్సిటీ జోన్ ను 225 ఎకరాల్లో నిర్మిస్తారు. స్పోర్ట్స్ యూనివర్సిటీ 258 ఎకరాల్లో, హెల్త్ సిటీని 116 ఎకరాల్లో, రెసిడెన్షియల్ జోన్ కు 1,170 ఎకరాల్లో, ఎంటర్టైన్మెంట్ జోన్ కు 336 ఎకరాల్లో నిర్మిస్తారు. ఇందులో భాగంగా ఇక్కడ మల్టీప్లెక్స్ , పార్కులు, హోటళ్లు నిర్మించనున్నారు.

అమెరికా తరహాలో వరల్డ్ ట్రేడ్ సెంటర్
అమెరికాలోని వరల్డ్ ట్రేడ్ సెంటర్ తరహాలో ఫ్యూచర్ సిటీలో ట్రేడ్ సెంటర్ ఏర్పాటు చేసేందుకు వరల్డ్ ట్రేడ్ సెంటర్ ప్రతినిధులు ముందుకొచ్చారు. ఇటీవల ప్రభుత్వంతో ఇందుకు సంబంధించిన ఒప్పందం జరిగింది. ఈ నేపథ్యంలో వరల్డ్ ట్రేడ్ సెంటర్ నిర్మాణానికి అనువైన స్థలం కోసం రెవెన్యూ, పరిశ్రమల శాఖ అధికారులు అన్వేషిస్తున్నారు. విమానాశ్రయం, మెట్రో రైల్ స్టేషన్లకు వేగంగా చేరుకునేలా తమకు 50 ఎకరాల స్థలాన్ని కేటాయించాలని, భవిష్యత్ అవసరాలను దృష్టిలో పెట్టుకుని పార్కింగ్ కోసం అదనంగా మరో 20 ఎకరాలు కేటాయించాలని సంస్థ ప్రతినిధులు కోరినట్లు ప్రభుత్వ వర్గాలు చెబుతున్నాయి. ఫ్యూచర్ సిటీ హైదరాబాద్ ప్రతిష్టను విశ్వవ్యాప్తం చేసేందుకు పునాదులు వేస్తుందనేది నిర్వివాదాంశం.