మీడియా అక్రెడిటేషన్కు కొత్త నిబంధనలు
‘తెలంగాణ మీడియా అక్రెడిటేషన్ రూల్స్–2025’కు ప్రభుత్వం ఆమోదం
2016 నాటి నిబంధనల రద్దు.. జీవో విడుదల
హైదరాబాద్, డిసెంబర్ 22:
రాష్ట్రంలోని జర్నలిస్టులకు జారీ చేసే మీడియా అక్రెడిటేషన్ కార్డుల విషయంలో తెలంగాణ ప్రభుత్వం కీలక నిర్ణయం తీసుకుంది. 2016లో అమలులోకి వచ్చిన పాత నిబంధనలను రద్దు చేస్తూ ‘తెలంగాణ మీడియా అక్రెడిటేషన్ రూల్స్–2025’ ను ఖరారు చేసింది. ఈ మేరకు ప్రభుత్వం జీవో ఎంఎస్ నెం.252 (G.O.Ms.No.252) ను జారీ చేసింది.
మీడియా రంగంలో మారుతున్న పరిస్థితులు, డిజిటల్ విస్తరణ దృష్ట్యా కొత్త నిబంధనలను రూపొందించినట్లు ప్రభుత్వం వెల్లడించింది. అక్రెడిటేషన్ కమిటీల కాలపరిమితి, మీడియా కార్డుల వినియోగం, డిజిటల్ మీడియా అర్హతలు, జర్నలిస్టుల విద్యార్హతలపై స్పష్టమైన మార్గదర్శకాలు రూపొందించారు.
కమిటీల పదవీకాలం రెండేళ్లు
రాష్ట్ర స్థాయి మీడియా అక్రెడిటేషన్ కమిటీ (SMAC), జిల్లా స్థాయి మీడియా అక్రెడిటేషన్ కమిటీ (DMAC)ల పదవీకాలాన్ని రెండేళ్లుగా నిర్ణయించారు. కొత్త కమిటీలు ఏర్పాటయ్యే వరకు పాత కమిటీలు కొనసాగుతాయని జీవోలో స్పష్టం చేశారు.
అక్రెడిటేషన్ కార్డు – మీడియా కార్డు మధ్య తేడా
కొత్త నిబంధనల ప్రకారం రెండు రకాల కార్డులను ప్రభుత్వం నిర్వచించింది.
- అక్రెడిటేషన్ కార్డు: ప్రభుత్వ సమాచారాన్ని సేకరించేందుకు రిపోర్టర్లకు గుర్తింపుగా ఉపయోగపడుతుంది.
- మీడియా కార్డు: డెస్క్ జర్నలిస్టులకు జారీ చేస్తారు. ఇవి ప్రభుత్వ సంక్షేమ పథకాల ప్రయోజనాలకే పరిమితం.
డిజిటల్ మీడియాకు తొలిసారి నిబంధనలు
డిజిటల్ న్యూస్ మీడియాకు తొలిసారి ప్రత్యేక అర్హతలు నిర్దేశించారు. అక్రెడిటేషన్ పొందాలంటే సంబంధిత వెబ్సైట్కు గత ఆరు నెలలుగా నెలకు కనీసం 5 లక్షల యూనిక్ విజిటర్స్ ఉండాలి. రాష్ట్రవ్యాప్తంగా డిజిటల్ మీడియా విభాగంలో గరిష్టంగా 10 అక్రెడిటేషన్ కార్డులు మాత్రమే జారీ చేస్తారు.
మీడియా సంస్థల అర్హతలు
- న్యూస్ పేపర్లు: కనీసం 2,000 ప్రతులు పంపిణీ అయ్యే దినపత్రికలే అర్హులు. PRGI రిజిస్ట్రేషన్ తప్పనిసరి.
- ఎలక్ట్రానిక్ మీడియా: శాటిలైట్ ఛానళ్లలో కనీసం 50 శాతం వార్తా కంటెంట్ ఉండాలి.
- లోకల్ కేబుల్ ఛానళ్లు: రోజుకు కనీసం మూడు న్యూస్ బులెటిన్లు ప్రసారం చేయాలి.
జర్నలిస్టుల విద్యార్హతలు
స్టేట్ లెవల్ అక్రెడిటేషన్కు డిగ్రీ విద్యార్హత లేదా ఐదేళ్ల అనుభవం తప్పనిసరి.
నియోజకవర్గ, మండల స్థాయి రిపోర్టర్లకు ఇంటర్మీడియట్ విద్యార్హత ఉండాలి.
ఫ్రీలాన్స్, వెటరన్ జర్నలిస్టులకు అవకాశం
15 ఏళ్ల అనుభవం ఉన్న ఫ్రీలాన్స్ జర్నలిస్టులు, అలాగే 30 ఏళ్ల అనుభవంతో 58 ఏళ్లు నిండిన వెటరన్ జర్నలిస్టులు కూడా అక్రెడిటేషన్ కార్డులకు దరఖాస్తు చేసుకునే అవకాశం కల్పించారు.
కమిటీల నిర్మాణం
- రాష్ట్ర కమిటీ (SMAC): మీడియా అకాడమీ చైర్మన్ చైర్మన్గా, ఐఅండ్పిఆర్ కమిషనర్ కో-చైర్మన్గా వ్యవహరిస్తారు. వివిధ జర్నలిస్టు యూనియన్ల ప్రతినిధులు, పీసీఐ సభ్యులు ఇందులో ఉంటారు.
- జిల్లా కమిటీ (DMAC): జిల్లా కలెక్టర్ చైర్మన్గా, డీపీఆర్వో మెంబర్ కన్వీనర్గా వ్యవహరిస్తారు.
నిబంధనల ఉల్లంఘనకు కఠిన చర్యలు
అక్రెడిటేషన్ కార్డుల దుర్వినియోగం, తప్పుడు సమాచార సమర్పణ లేదా నిబంధనలకు విరుద్ధంగా వ్యవహరించినట్లయితే కార్డులను రద్దు చేసే అధికారం ప్రభుత్వానికి ఉంటుందని జీవోలో పేర్కొన్నారు. కార్డు పోగొట్టుకున్నట్లయితే రూ.250 ఫీజుతో డూప్లికేట్ కార్డు పొందవచ్చని తెలిపారు.
