మన రాష్ట్రంలో టమాట కోటిశ్వరడు
12 ఎకరాల్లో టమాట సాగు
నెల రోజుల్లో 8వేల బాక్స్ ల టమాటలు అమ్మిండు
యావరేజ్ బాక్స్ కు రూ.2.300 చొప్పున ధర
రూ.1.84 కోట్లు సంపాదించిన మెదక్ రైతు
మెదక్, జులై 21, 2023
పక్క స్టేట్ లోనే కాదు మన రాష్ట్రంలోను టమాటాలు అమ్మి కోటీశ్వరుడైన రైతు ఒకరున్నారు. ఆయనే మెదక్ జిల్లాకు చెందిన మహిపాల్ రెడ్డి..టామాట రేటు రూ.150కి చేరగా, పక్క రాష్ట్రమైన మహారాష్ట్రలో టమాటలు పండించిన రైతులు లక్షాధికారులయ్యారు. పుణేకు చెందిన తుకారం భాగోజీ గాయకర్ కేవలం టమాటలు అమ్మి. రూ.1.50 కోట్లు సంపాదించగా మన రాష్ట్రంలో రైతు అంత కంటే ఎక్కువే సంపాధించి సత్తా చాటాడు..
రూ.1.84 కోట్లు సంపాదించిన మెదక్ రైతు..
మెదక్ జిల్లా కౌడిపల్లి మండలం మహ్మద్‌నగర్ కు చెందిన రైతు బాన్స్‌వాడ మహిపాల్ రెడ్డి తనకున్న 60 ఎకరాల్లో ఆధునిక పద్ధతుల్లో పంటలు సాగు చేస్తుంటాడు. ఇతర రాష్ట్రాల నుంచి కూరగాయలు దిగుమతి అవుతుండడంతో కూరగాయ పంటలపైనే దృష్టి పెట్టాడు. మూస పద్ధతిలో కాకుండా పందిరి విధానంలో, డ్రిప్ సిస్టం ఏర్పాటు చేసి కూరగాయలు పండిస్తాడు. దీనివల్ల దిగుబడి ఎక్కువ రావడంతో పాటు, కూరగాయలు క్వాలిటీగా ఉండి మార్కెట్లో మంచి ధర పలుకుతాయి. ఈ క్రమంలో వేసవిలో కూరగాయలకు ఎక్కువ డిమాండ్ ఉండడాన్ని గమనించి ఏప్రిల్, మే నెలల్లో 12 ఎకరాల్లో క్యాప్సి కం. 12 ఎకరాల్లో టమాట సాగు చేశాడు. మేలైన పద్ధతుల్లో సాగు చేయడంతో దిగుబడి బాగా వచ్చింది.
అనూహ్యంగా టమాట ధర రూ. 150 వరకు పెరిగింది. అంతేగాక మహిపాల్ పండించిన టమాట క్వాలిటీగా ఉండడంతో ఇతర స్టేట్స్ నుంచి దిగుమతి అయిన దానికంటే ఎక్కువ ధర పలికింది. రోజూ 250 బాక్స్‌ల చొప్పున మార్కెట్లో అమ్మాడు. నెల నుంచి టమాట పంట చేతికందుతుండగా మహిపాల్ రెడ్డి హైదరాబాద్ లోని బోయిన్ పల్లి, షాపూర్ నగర్, పటాన్‌ చెరు మార్కెట్ కు తరలిస్తున్నాడు. టమాటలను తెంపిన తర్వాత పొలం వద్దే కూలీలతో గ్రేడింగ్ చేసి పాడవకుండా బాక్సుల్లో ప్యాక్ చేసి డీసీఎం వ్యాన్, ట్రాలీ ఆటోల్లో మార్కెట్ కు పంపిస్తున్నాడు. రోజుకు 250 బాక్స్‌ల చొప్పున నెల రోజుల్లో 8,000 బాక్స్ ల టమాటలు అమ్మినట్లు చెప్పాడు. యావరేజ్ బాక్స్ కు రూ.2.300 చొప్పున ధర రాగా ఇప్పటి వరకు అమ్మిన టమాటల ద్వారా రూ.1.84 కోట్ల ఆదాయం వచ్చిందని చెప్పాడు. ఇప్పటి వరకు అమ్మింది పోను ఇంకా 8 వేల బాక్స్ దిగుబడి వస్తుందని తెలిపాడు. టమాట రేటు తగ్గినా కోటి ఆదాయం వస్తుందని ధీమా వ్యక్తం చేశాడు.
12 ఎకరాల్లో టమాట సాగు చేసిన…ఇంత లాభం ఊహించలే..
మన రాష్ట్రంలో టమాట పంట తక్కువ సాగు చేస్తరు. అందుకే కర్నాటక నుంచి బెంగళూర్ టమాట ఎక్కువగా దిగుమతి అవుతోంది. ఇది గమనించి వేరే రాష్ట్రాల నుంచి టమాట దిగుమతి చేసుకోవాల్సిన అవసరం ఉండకూడదని 12 ఎకరాల్లో టమాట సాగు చేసిన. ఎకరాకు రూ.2 లక్షల ఖర్చు చేసి పందిరి విధానంతో సాగు చేసిన. మంచి దిగుబడి రాగా, మార్కెట్లో టమాట ధర పెరడంతో ఊహించని లాభం వచ్చింది.
-మహిపాల్ రెడ్డి, రైతు, మహ్మద్ నగర్ గ్రామం, మెదక్ జిల్లా
